u've to mean it, u've to feel it

الليلادى ابويا كان خرج بعد صلاه المغرب كان رايح مشوار وكنت انا بحاول اذاكرذاكرت شويه وقعدت على الكمبيوتر شويه

وبعدين حسيت بكئابه الشقه فقعدت فى البلكونه وكالعاده سرحت فى حاجات كتير

المهم ابويا جه متأخر شويه وبعد مادخل وغير هدومه....قعد يهزر معايا شويه وانا استحلتها الحقيقه

مانا بقالى حوالى 5 ساعات قاعد لوحدى

ولقيته بيقولى ....انا هادخل انام مش عايز حاجه منى ....كالعاده قولتله ربنا يخليك ليا يا زعيم

بس مش عارف ليه حسيت انى ماقولتاش المره دى زى كل مره

انا بقول لابويا ربنا يخليك ليا كذا مره فى اليوم...بس قليل لما بقولها بالاحساس ده

وانا بقولها المره دى حسيتها بجد...وحسيت انى كنت اقصدها من كل قلبى

فى ناس كتير حوالينا بنحبهم اوى ...بس يمكن عشان قدامنا على طول مابنبقاش واخدين بالنا

وفى كلام كتير بنقوله ليهم بس قليل اوى لما بنبقى حسينه وقاصدينه بجد

كام كلمه واحشنى وبحبك وربنا يخليك ليا وربنا يكرمك وطمنى عليك بتتقال كل يوم للناس الى بنحبهم

بس افتكر كدا كام مره فيهم حسيت الكلام وانت بتقوله؟؟

انا الى خلانى اكتب الكلام ده...انى حسيت ان الواحد لازم يجدد حب الناس فى قلبه

لازم يحبهم من كل قلبه

يمكن كان فى كلمتين قريتهم من زمان اوى وافتكرتهم دلوقتى

اعطى الناس اكثر مما يتوقعوا...وعندما تقول احبك فلابد ان تعنيها

"ربنا يخليك ليا يابويا"